06. mai 2021

Lestrarstarv hjá Sambandsflokkinum á Fólkatingi

Hevur tú áhuga í politikki, búskapi, samskifti og samfelagsviðurskiftum sum heild? Og kundi tú hugsað tær at komið heilt niður í politiska maskinrúmið á Christiansborg? So er lestrarstarvið hjá Sambandsflokkinum á Fólkatingi møguliga nakað fyri teg.

Toymið hjá Sambandsflokkinum á Fólkatingi. Frá vinstru: Linnéa L. Petersen, Anna Falkenberg, Annika Fossá og Jógvan í Dímun Højgaard. Árni Guldborg Nielsen vantar á myndini.

UM STARVIÐ
Vit kunnu bjóða tær eitt áhugavert starv í einum mennandi umhvørvi, har tú fært innlit í politiska gerandisdagin á Fólkatingi. Tú fert at arbeiða tætt saman við bæði fólkatingsumboðnum og starvsfólkahópinum hjá Sambandsflokkinum, sum telur fimm starvsfólk - tvey fulltíðarsett, tvey lestrarstørv og ein praktikant. Vit gleða okkum til, at tú verður partur av góða felagsskapinum, vit hava á skrivstovuni.

Arbeiðsuppgávurnar á skrivstovuni hjá Sambandsflokkinum á Fólkatingi eru nógvar og ymiskar og fevna millum annað um løgfrøðiligar spurningar, málsfyrireikingar, journalisering, research, fyrireiking av fundum og ráðstevnum. Tú kemur at taka lut í øllum hesum uppgávum og harafturat fert tú at hava serliga ábyrgd av búskaparligum arbeiði, herundir m.a. roknskapi, bókhaldi og fíggjarætlan.

UM TEG
Tú hevur lisið í minsta lagi í tvey ár og ert sostatt annaðhvørt á seinasta ári av bachelorútbúgvingini ella ert farin í gongd við kandidatlesnaðin. Tað er ein fyrimunur, um útbúgvingin hevur ein búskaparligan leist.

Vit vænta, at tú:

  • hevur áhuga bæði í føroyskum og donskum politikki
  • hevur innlit og møguliga royndir við roknskaparligum arbeiði
  • arbeiðir sjálvstøðugt
  • trívist væl við nógvum ymiskum arbeiðsuppgávum
  • hevur góð samstarvsevni
  • hevur góðar málsligar og skrivligar førleikar bæði á føroyskum, donskum og enskum.

UMSÓKN
Umsókn, cv, viðmæli og onnur viðkomandi skjøl skulu sendast til Anniku Fossá á annika.fossa@ft.dk í seinasta lagi 31. mai 2021. Skriva ”Lestrarstarv” í evnisteigin. Vit halda setanarsamrøður leypandi ella sum skjótast eftir umsóknarfreistina.

Okkara nýggi starvsfelagi skal byrja 15. august 2021 ella eftir nærri avtalu. Starvsstaðurin er Sambandsflokkurin á Fólkatingi á Christiansborg í Keypmannahavn. Starvið er tímalønt, og vit vænta, at tú kanst arbeiða 15-20 tímar um vikuna. Vit tillaga sjálvsagt arbeiðstíðina eftir lestrarvirksemi og øðrum.

Um tú hevur spurningar til starvið ella Sambandsflokkin á Fólkatingi, ert tú vælkomin at venda tær til Anniku Fossá, tlf. 6162 3436, ella til Annu Falkenberg, tlf. 6162 4253.

Vit gleða okkum at hoyra frá tær.